Shenja e ditës së parë
ose dita e parë e Shenjës

Ata që e kanë ndjekur projektin medial “Shenja”, që doli në qarkullim në muajin prill të vitit 2011,
e mbajnë mend mirë alegorinë e anekdotës së thneglës që me kovë në dorë kishte dashur ta shuante
zjarrin që ishte ndezur për profetin Ibrahim/Abraham, duke shpjeguar se Shenja, ndonëse ishte e
bindur se nuk mund ta bënte gjithë punën në emancipimin kulturor e intelektual të shqiptarëve, së
paku dëshironte që kështu të dëshmonte se në cilën anë ishim ne, themeluesit, projektuesit dhe realizuesit
e këtij projekti, në këtë kohë e në këtë gjendje.
Të prirë nga kjo, Shenja në muajin prill e përmbyll një cikël 24-numrash, njësoj si cikli i një dite e
natë dhe tash po e hap ditën e re. Ndërkaq, duke e ditur se dita e mirë shihet në mëngjes, kemi shpresë
se mëngjesi i Shenjës së ditës së parë ose dita e parë e Shenjës ka sjellë një freski mediale, duke
vendosur standarde të reja ose dukë ripërtërirë standarde që mbase hëpërhë u kanë munguar mediave
shqiptare.
Në Shenjën e ditës së parë ose në ditën e parë të Shenjës kjo revistë ia doli të mbetet revista e
vetme e shtypur mbarëkombëtare, megjithëse e “kontrabanduar” në Republikën e Shqipërisë e të
Kosovës, të cilat jo vetëm që nuk kanë shfaqur dëshirë ta ndihmojnë dhe afirmojnë këtë projekt për
integrimin e shqiptarëve, por kanë vazhduar ta trajtojnë atë si secilin mall tjetër që duhet të hyjë në
ato dy shtete nga një shtet i huaj. Për fat të keq!
Në Shenjën e ditës së parë ose në ditën e parë të Shenjës ne besojmë se ia dolëm të krijojmë një
dritare të njëmendtë të lirisë së mendimit, të afirmimit të mendimit ndryshe, të debatit për çështje të
gjithmbarshme shqiptare, duke u bërë kështu një tribunë ku të gjithë shqiptarët, pavarësisht kufijve,
të mund të diskutojnë shtruar për çështje që kanë të bëjnë me ata.
Në Shenjën e ditës së parë ose në ditën e parë të Shenjës jemi munduar që të jemi gjithëpërfshirës
në të gjitha aspektet: duke pasur parasysh gjeografinë shqiptare, që nga Çamëria e deri në Mal të Zi;
duke respektuar spektrin politik, me përfshirjen e të gjitha profileve të politikanëve e përfaqësuesve
shqiptarë; duke pasur konsideratë për të gjitha vlerat shqiptare në të gjitha fushat e jetës shoqërore,
gjithnjë duke qenë të kujdesshëm që kjo përfshirje të jetë e balancuar, që me gjithë këtë të japim
mesazhin se ka mundësi reale të bëhet një integrim i vullnetshëm ndërshqiptar.
Në Shenjën e ditës së parë ose në ditën e parë të Shenjës kemi pasur edhe mjaft probleme, kemi
pasur mungesë mjetesh për realizimin e projektit, kemi pasur zhgënjime nga figura publike që nuk
kanë pasur vesh për ta dëgjuar projektin “me kovë në dorë”, kemi pasur edhe dëshpërime që na
kanë bërë të pyetemi se “a ia vlen kjo?!”, por gjithnjë na ka mbajtur gjallë mësimi i thneglës së Abrahamit/
Ibrahimit.
Në këtë mënyrë, në Shenjën e ditës së parë ose në ditën e parë të Shenjës, pra në këto 24 numra
(sepse numrin 00 ia kemi falë Komandatit Adem Jashari dhe atë nuk e numërojmë), konsiderojmë se
ne dëshmuam se ishim në anën e të gjithë atyre që sot e kanë dertin e shqiptarisë, të atyre që e kanë
hallin e mirëqenies shqiptare në Ballkan, të atyre që punojnë dhe veprojnë në këtë drejtim, por edhe
në anën e atyre që synojnë mirëqenien e mbarë njerëzimit, pra edhe përtej përkufizimit “shqiptar”.
Në Shenjën e ditës së parë ose në ditën e parë të Shenjës, edhe sot kur në Maqedoni po vlon nga
tensionet ndëretnike, kur Kosova po tundet nga bisedimet për fatin e saj në të ardhmen dhe kur
Shqipëria, me gjithë dëshirën tonë, nuk po arrin ta marrë veten për t’u bërë strumbullari shqiptar në
Ballkan, ne kujtojmë se me këto 2500 faqe material kemi dhënë diçka që do të mbetet së paku një “gur
në murin e atdheut”.
Megjithëse historia do të jetë gjykatësja më e mirë e punës sonë, ne mbetemi me shpresë se me këtë
mbase kemi arritur të dëshmojmë se në cilën anë ishim ne! Ndonjëherë edhe kjo mjafton! Urime ky
jubile i madh për Shenjën dhe i vogël për Shenjtërinë!
Zeqirija Ibrahimi